ბაკურიანში, იუსტიციის სახლის შეხვედრების დარბაზში უწყებათშორისი საკოორდინაციო შეხვედრა გაიმართა

სსიპ ,,ბაკურიანის განვითარების სააგენტოს’’ თავმჯდომარის, ეკატერინე ორჯონიკიძის, ინიციატივით ბაკურიანში, იუსტიციის სახლის შეხვედრების დარბაზში უწყებათშორისი საკოორდინაციო შეხვედრა გაიმართა, რომელსაც საქართველოს რეგიონული განვითარებისა და ინფრასტრუქტურის მინისტრის მოადგილე, კობა გაბუნია, სამცხე–ჯავახეთში სახელმწიფო რწმუნებულის პირველი მოადგილე დავით ვარდიაშვილი, სსიპ ,,ბაკურიანის განვითარების სააგენტოს’’ თავმჯდომარე, თავმჯდომარის მოადგილე, ბორჯომის მუნიციპალიტეტის მერიის, სსიპ ,,საქართველოს მუნიციპალური განვითარების ფონდის’’, საქართველოს გაერთიანებული წყალმომარაგების კომპანიის სამცხე-ჯავახეთის რეგიონული ფილიალის, ენერგო–პრო ჯორჯიასა’’ და ,,სოკარ ჯორჯია გაზის’’ წარმომადგენლები ესწრებოდნენ. 

შეხვედრის მიზანს ბაკურიანში არსებული გამოწვევების, მიმდინარე და დაგეგმილი პროექტების განხილვა წარმოადგენდა.

სსიპ ,,ბაკურიანის განვითარების სააგენტოს’’ თავმჯდომარის განმარტებით, ბაკურიანში არაერთი მასშტაბური და მნიშვნელოვანი პროექტის განხორციელებაა დაგეგმილი. ეკატერინე ორჯონიკიძის თქმით, პროექტების მიმდინარეობის დროს მნიშვნელოვანია მოსახლეობასთან ხშირი კომუნიკაცია და სწორი ინფორმაციის მიწოდება თითოეული ნაბიჯის შესახებ. ასევე, მნიშვნელოვანია, რომ დაგეგმილი სამუშაოები დათქმულ ვადებში განხორციელდეს. შესაბამისი უწყებები კი ინტენსიურ კომუნიკაციაში იქნებიან მოსახლეობასთან, რათა პროექტების განხორციელების დროს შექმნილი დისკომფორტი მინიმუმამდე იქნას დაყვანილი.